Ginakumpleto pa ang mga dokumento nga kinahanglan sa pagpasaka sang kaso kay Patrolman Alvin Rios, ang pulis nga nagluthang patay sa isa pa ka pulis matapos sini maaktuhan nga hublas samtang yara sa kwarto sang ila balay upod sa iya live in partner kag anom ka bulan nga lapsag.
Sa interview sang Bombo Radyo Bacolod kay Police Major Eugene Tolentino, station commander sa Bacolod Police Station 8, ginahulat pa nila ang resulta sang laboratory investigation kaangay sang autopsy, ballistic kag paraffin test kasubong man ang affidavit sang tatlo ka witnesses.
Kun ini ang mahingagaw si Rios ang ginalantaw nga mapasakaan sang kaso nga murder sa Lunes.
Madumduman nga si Rios, nga assigned sa 1st Mobile Force Company sang Iloilo Police Provincial Office, ang nagikan man sa ila balay sang Huwebes apang naglesinsya na ini nga magabalik sa Iloilo.
Apang kaangay nga ginlipot lamang sini ang live in partner kag nagbalik kahapon, kun sa diin naaktuhan sini mismo nga updanay sa kwarto ang misis kag si Police Staff Sergeant Jotham Aremtuto, 31 anyos, assigned sa Mobile Patrol Unit sang Bacolod City Police Office nga hublas.
Matapos ang krimen, wala naman nagpalagyo si Rios kag ginhulat na lamang nga siya ang dakpon.
Suno kay Tolentino, kaangay nga natrauma man si Rios sa iya nahimo kun sa diin ini ang masami tulala kag halos wala man nagakaon.
Apang aminado ini nga indi agresibo ang pulis, kag nagakooperar lamang sa ila imbestigasyon.
Magluwas sa criminal case nga ipasaka, nagapatigayon man sang separado nga imbestigasyon ang Internal Affairs Service (IAS) kag National Police Commission (NAPOLCOM) sa posibilidad sang pagpasaka sang kaso administratibo.
