BACOLOD CITY — Ginalauman ang mas madasig nga pag-proseso sa pagpatigayon sang rehabilitasyon sang Bacolod City Public Plaza.
Ini ang kasunod sang pagpasar sang resolusyon nga naga-endorsar ukon nagaaprubar sang pagpa-improbar sang plaza sa ginpatigayon nga regular session sang Sangguniang Panlungsod kahapon, Myerkules.
Nahibaluan nga kinahanglan ang endorsement antes makapatigayon sang bidding kag pagpatigayon sang proyekto.
Angot sini, ginpahayag ni Bacolod Lone District Cong. Greg Gasataya nga ang endorsement gikan sa konseho ang igahatag sa Department of Public Works and Highways (DPWH) nga amo ang natungdan nga ahensiya para sa proyekto.
Sa maabot nga bulan sang Hulyo patigayunon ang bidding kag suno kay Cong. Gasataya, kinahanglan nga suguran gilayon ang proyekto agud matapos ini sa labing madali nga tinion.
Ginalauman nga makahingagaw ang proyekto antes ang Masskara Festival sa bulan sang Oktubre.
