Gin-ako sang New People’s Army ang pagpatay sa anay miyembro sang Revolutionary Proletarian Army (RPA) sa Prk Vanda, Brgy Santol, Binalbagan sang Mayo 19 sa panindugan nga ini ang intelligence-asset sang 94th Infantry Battalion sang Philippine Army.
Ang biktima ang ginkilala nga si Joseph Agustin, 38 anyos, manug-uling, anay RPA member, kag residente sa lugar.
Sa ginpagwa nga statement sang Romeo Nanta Command sang NPA, gindagdagan nila sang silot nga kamatayon si Agustin bangod ini ang intelligence asset sang 94th IB.
Paathag sang rebelde nga grupo nga ang Revolutionary Proletarian Army ang grupo nga nagsipak sa NPA, kag nangin para-military force sang gobyerno.
Si Agustin ang gina-alegar nila nga matapos sang training, si Agustin ang nagpatigayon sang mga anti-revolutionary activities kag nag-upod sa operasyon sang gintawag nila nga ‘berdugo’ nga mga militar batok sa mga NPA sang 2022.
Pahayag sang NPA nga ang ginhimo nga pagpatay ang pahanumdom kag paandam sa mga anti-revolutionary kag anti-social forces, nga mag-untat na kag magsurrender sa NPA.
Apang kun magpadayun, nagpaandam man ang NPA nga ang mga ini ang lagson sang revolutionary court.
