BACOLOD CITY — Naga-init sang tubig sa sulod sang payag-payag ang miyembro sang Barangay Lupon nga gintiro-patay sang Special Action Force kag Negros Occidental Police Provincial Mobile Force sa Barangay Laga-an, banwa sang Calatrava, kahapon sang kaagahon.
Sa pagsikyar sang Bombo Radyo sa Sitio Balea, nahamtang ang payag-payag nga ginatulugan ni Bolbet Leyte, 42-anyos, sa higad sang kampo sang tubo isa ka pukatod.
Bilang encargado, sa payag-payag nagatulog si Leyte kag nagaisahanon lang siya diri.
Suno sa mga himata sang biktima, nagainit ini sang tubig pasado alas 4:00 sang kaagahon agud nga makapangape sang hinali lang nag-abot ang mga miyembro sang elite force kag mobile force sang PNP.
Ginpasiga sang biktima ang flashlight kag didto na nagluntad ang linupok nga ginkamatay sini.
Nahibaluan nga ang balay sang biktima kag sang iya mga himata ang nahamtang sa pihak nga pukatod.
Suno sa misis sini nga si Alicia, wala siya sang ideya kun ngaa ginpatay ang iya bana.
Nabatian man sini ang linupok apang wala gid siya nagdumdom nga iya mister ang ginluthang.
Ginakabig sang mga himata sang miyembro sang Barangay Lupon sa Barangay Laga-an sa banwa sang Calatrava nga “overkill” ang pagpatay sa biktima.
Tata sang bala ang magtimbang nga tiil kag may mga pilas man sa iban nga parte sang lawas si Bolbet Leyte, 42-anyos matapos nga gintiro sang mga miyembro sang Special Action Force kag Negros Occidental Police Provincial Mobile Force.
Sa interview sang Bombo Radyo, ginpahayag ni Barangay Kagawad Brendaly Dumarig, bayaw sang biktima, nga alas 4:15 kaagahon sang nabatian nila ang linupok.
Ginkadtuan nila ang payag nga ginatiniran sang biktima sa higad sang kampo sang tubo kag ila naabutan nga wala na ini sang kabuhi.
Yara man sa sulod sang payag ang mga miyembro sang SAF kag mobile force apang nagpamangkot ang mga ini sa mga himata kun kilala nila ang napatay.
Bangud sini, nagapati sanday Dumarig nga mahimo nasal-an lang sang elite force kag mobile force ang biktima kag lain kuntani ang ila target.
