Nalab-ot sang Bacolod City Police Office (BCPO) ang target nga zero crime incidents sa bag-o lamang natapos nga Bacolod Chicken Inasal Festival.
Sa interview sang Bombo Radyo Bacolod kay Police Lt. Col. Ronnie Brillo, commander sa Bacolod City Mobile Force Company, wala sang reported nga kinawatay kag kinagamo sa tatlo ka festival sites nga ginalakipan sang North Capitol Road, Upper East Megaworld kag Manokan Country humalin sang Biyernes tubtob Domingo, kasubong man sa gwa sang festival sites.
Aminado naman ini nga dyutay ang mga festival goers kahapon bangod sa pag-ulan ulan.
Suno kay Brillo, ang gindeploy nga masobra 600 nga mga kapulisan ang amat-amat na nga nagpauli halin alas-2:00 sang kaagahon.
Kasunod sini, magabalik na sa regular duty sa ila tagsa ka Police Station ang mga personnel.
Paathag ni Brillo nga lain man nga batch sang mga police personnel ang gindeploy sa pagbantay sa ginapatigayon nga Reserve Officer’s Training Corps (ROTC) Games 2024 Visayas leg, nga nagadangat sa 95 ka mga personnel.
Magluwas sa mga kapulisan, may augmentation man ang Bureau of Fire Protection (BFP), medical personnels kag mga forced multipliers.
Ginapasalamatan naman ni BCPO Director Police Col. Noel Aliño ang mga police personnel kag mga volunteers kasubong man ang kooperasyon sang mga pumuluyo, rasun nga nalab-ot ang target nga zero-crime incidents sa mga kasadyahan.
