Luyag sang secretary general sang United Negros Drivers and Operators Center (UNDOC) nga magpatawag sang unity forum kaupod ang traditional jeepneys, modernized jeepneys kag mga ahensya sang gobyerno nga may kaangtanan sa sektor sang transportasyon.
Nagpahayag ang Transport group nga Manibela nga sila magapatigayon sang transport strike sa Agosto 14 tutob Agosto 16 matapos nga gin-reject ni President Ferdinand “Bongbong” Marcos Jr ang Senate resolution para sa suspension sang Public Utility Vehicle Modernization Program.
Sa interview sang Bombo Radyo Bacolod kay Diego Malacad, secretary general sang United Negros Drivers and Operators Center (Undoc), dapat nga i-address ang problema sa pagpatuman sang PUV modernization program humalin sa basic nga mga isyu.
Suno diri, ang nagakatabo sa karun ang indi away-pulitiko apang ang naga-ilinaway amo ang mga transport sector bangod nga gin-implementar ang programa sa mga ciudad kag banwa nga wala natun-an sang husto.
Dugang pa sini, may yara man sang kapaltahan sa bahin sang mga Local Government Units nga wala nagdihon sang isa ka grupo nga magreview sang programa kag mahatagan sang solusyon ang problema.
Luyag sini sa karun nga magpatigayon sang unity forum kaupod ang traditional jeepenys, modernized jeepneys, Land Transportation Franchising and Regulatory Board (LTFRB), Land Transportation Office (LTO) kag LGU’s agud masturyahan ang mga problema sa PUV modernization program kag wala sang basolay nga matabo.
