Katingalahan suno sa political analyst kun ngaa ginsubpoena sang prosekusyon si Atty Zuleika Lopez, Chief of Staff sang Office of the Vice President sa impeachment trial batok kay Vice President Sara Duterte.
Sa interview sang Bombo Radyo Bacolod kay Atty Jomax Ortiz, makabig nga ginasaligan gid nga persona si VP Sara si Lopez bangod sang ini ang alkalde sa Davao City, si Lopez ang iya City Administrator; sang mangin Bise Alkalde si VP Sara, ini ang nagserbe naman nga head sang Sangguniang Bayan, kag sang siya ang nangin Bise Presidente, si Lopez ang iya naman nangin Chief of Staff.
Gani ginkakibot nila nga prosekusyon ang magapresentar kay Lopez para sa fourth articles of impeachment nga grave threat kag betrayal of public trust.
Mahimo nga si Lopez ang magaserbe nga hostile witness, apang mahimo man nga ini ang nagtipyok na sa pihak nga kampo.
Pahanumdom ni Ortiz nga sa masami, ang mga witnesses nga ginapresentar sang prosekusyon amo ang makabulig sa ila agud mas magbug-at ang ebidensya sa kaso.
Suno kay Ortiz, bangod napresentar na ang screen recording sang press conference ni VP Sara, mahimo gamiton si Lopez agud magtestify sa kamatuoran sini kun siya ang nakatambong mismo.
Nagapati si Ortiz nga ini ang kabahin sa game plan agud mademoralize ang mga Duterte.
Suno kay Ortiz, balantayan pa kun sa diin ang mangin linyada ni Lopez sa iya pag-atubang sa cross examination sang Senator-Judges.
