Padayon ang pag-evacuate sa mga pumuluyo sa ciudad sang Bacolod nga apektado sang baha bangod sa ulan nga dala sang bagyo VERBENA.
Sa interview sang Bombo Radyo Bacolod kay Mayor Greg Gasataya, naglibot-libot ini sa mga dalagko nga sapa sa ciudad nga nag-alalawas na.
Suno diri, ang tubig halin sa bukid sa banwa sang Murcia, Salvador Benedicto, kag ciudad sang Talisay nga nag-ilig panaog sa ciudad.
Bangod sini, tuman ang pagsaka sang tubig sa mga sapa sa Banago, Mandalagan, Lupit, Magsungay, Tangub kag Sum-ag.
Pahayag sang alkalde, focus gid sila sa karun sa pagrescue sa mga pumuluyo ilabi na ang wala nagsunod sa pre-emptive evacuation kaina sang aga.
Panawagan ni Gasataya, nga basta sa tion nga may abiso na nga mag-evacuate, mas maayo nga magsunod na lang para sa safety sang tanan.
Kaina sang aga, indi malabyan ang Araneta St, Lacson St, Bata flyover- Banago, New Government Center, HI Strip, Panasiatic Circumferential road, kag Magsaysay- Taculing Road.
