Gilaragway sang Pinay Nurse sa Riyadh, Saudi Arabia ang pagsaulog sang Eid’l Fitr ukon ang Festival of Breaking the Fast sa nasambitan nga Muslim Country.
Sa interview sang Bombo Radyo Bacolod kay Ferolyn Galeno Posecion, Bombo International News Correspondent sa Riyadh, siya ang nagsulod sa Islam sang 2012.
Gin-athag sini nga ang Eid’l Fitr ang pagtakop sang Ramadan, ukon ang bulan sang pagpuasa.
Ang Ramadan ang ika-siyam sa sa 12 ka bulan sang Muslim Calendar, kag sa nasambitan nga bulan nagapatigayon sang fasting, humalin sunrise tubtob sunset.
Indi sila pwede nga magkaon ukon mag-inom sang tubig kag ginadumilian man ang pagpakighilawas sa asawa.
Kaina sang aga, ang mga Muslim ang nagtipon man para sa Salatud Eid, kalakip ang holy prayer sa pagpanguna sang ila Immam.
Kasunod sini, sila ang nagabisita man sa pamalay sang kaupdanan nga Muslim nga kaangay sa mga kapiestahan bangod tanan nga pamilya ang nagapreparar man sang handa.
Ang iban nga may ikasarang ang nagabakal gid sang baka kag ginapa-ihaw kag ini ang ginapartido sa mga kaingod.
Suno kay Posecion ang lima ka haligi sang Islam ang ginalakipan sang pagtuo; pagpangamuyo, kun sa diin ang mga Muslim ang nagapangamuyo sang lima ka beses sa isa ka adlaw; paghatag sang bulig sa mga imol; fasting; kag ang pilgrimage kun sa diin sila ang nagalakbayon padulong sa mga Holy Places kaangay sa Mecca sa Saudi Arabia.
Ang mga opisina kag establishimento ang holiday naman halin Abril 4 tubtob 13.
Sila sa ospital ang wala naman sang holiday, apang naganubo man ang numero sang pasyente.
