Gin-athag sang hepe sang Sipalay City Police Station nga wala sang may nalapas nga tawhanon nga kinamatarong sa pag-operate kay Eddie Epogon nga gina-alegar nagbato sa otoridad nga nagserbe sang warrant of arrest sa iya sa Sitio Manluy-a, San Jose, Sipalay City nagligad nga Pebrero 20, alas-3:00 sang kaagahon.
Ini ang kasunod sang pagpadangat sang reklamo sang pamilya sang asawa ni Epogon sa Bombo Radyo Bacolod angot sa indi husto nga pagpatay nila sa suspetsado.
Suno kay alyas Michelle, pakaisa sang asawa ni Epogon, indi gid husto ang ginhimo sang mga otoridad sa pagpatay kay Eddie bangud nga ginbutang nila ang layi sa ila mga kamot.
Suno sa iya, na-trauma karon ang nabilin nga mag-iloy ni Epogon.
Nahibaluan nga sang namutikan ni Eddie ang presensya sang mga operatiba, ginpagwa niya sini sa ila balay ang iya asawa kag bata kag nagpalupok rason nga nagbalos ang mga otoridad.
Nakaangkon si Epogon sang isa ka igo sang bala sa iya nga ulo kag isa man ka igo sa dughan nga gintunaan sang iya kamatayon.
Suno kay alyas Michelle, nagakabalaka ini karon bangud nga luyag nalang mag-suicide sang asawa ni Eddie bangud sa natabo.
Suno sa iya, kuntani ginhatagan man sang otoridad si Epogon sang due process agud mapamatud-an nga sala ang mga pato-pato nga istorya batok sa ila.
Sa pagkamatuod gani suno kay alyas Michelle nga nagapanghakot sang balas sa cellsite si Epogon agud nga makakaon lang.
Luyag man sini nga iklaro kuntani nga indi tanan nga Epogon ang malain bangud nagaka-alarma karon ang bug-os nga pamilya sa mga nagagwa nga istorya nga tanan nga Epogon ang ishoot-to-kill.
Samtang, gin-athag naman ni P/Major James Latayon nga wala sang may nalapas nga tawhanon nga kinamatarong sa ginkasa nga operasyon.
Dugang pa sini nga wala sang kamatuoran nga ishoot-to-kill ang mga Epogon members.
Nagapangayo man ini sang pasaylo sa pamilya bangud wala man nila gin-gusto ang natabo.
