Desidido ang pamilya sang nurse nga nagabusong sang anum ka bulan nga napatay matapos mabunggoan sang duha ka salakyan samtang nagatabok sa Purok Proper North, Barangay Taloc, Bago City, Negros Occidental kagab-i nga magpasaka sang kaso batok sa duha ka mga driver.
Sa interview sang Bombo Radyo kay Police Lt. Col. Ariel Pico, officer-in-charge sang Bago City Police Station, nagtabok sa pedestrian lane ang nurse nga si Maria Angela Buendia, 36-anyos, anum ka bulan nga nagabusong kag residente sang nasambit nga lugar sang nabunggo-an ini sang Toyota Avanza Wagon nga ginamaneho ni Philip Jansen Cantiller, 30-anyos, residente sang Deca Homes Subdivision, Barangay Cabug, Bacolod City.
Nagtabog si Buendia sa pihak nga lane kun sa diin nalapakan ini sang Toyota Vios nga ginamaneho ni Salvador Castro, 59-anyos, residente sang Barangay Crossing Pulupandan, Pulupandan.
Bangod sa impact, naggwa sa tiyan sang iloy ang anum ka bulan nga ginadala sini nga lapsag.
Suno kay Pico, masanag ang area apang tinted ang salakyan.
Suno pa diri, ginahulat pa ang autopsy report agud mahibaluan kun paano naggwa ang lapsag nga lalaki sa tyan sang iloy.
Pahayag sini, reckless imprudence resulting to multiple homicide ang kaso nga ipasaka batok sa duha ka mga drayber.
SAMTANG….nagapanawagan sang hustisya ang pamilya sang nurse nga nagabusong nga napatay matapos mabunggoan sa Purok Proper North, Barangay Taloc, Bago City, Negros Occidental, alas 9:15 kagab-i.
Ang biktima ang ginkilala nga si Maria Angela Buendia, 36-anyos, anum ka bulan nga nagabusong, residente sang nasambit nga lugar.
Suno kay Carmela Buendia, ugangan sang biktima, nalipongan ini sang nahibaluan ang natabo.
Suno diri, ang lapsag ang ginhingadlan nga Mark nga Junior pa kuntani sang pamilya.
Suno pa diri, ginahambalan lang nila ang apat ka tuig nga bata nga magulang sang iya umagad nga ang iloy sini yara sa trabaho kag ang iya manghod ang kaupod sang iloy.
Pahayag ni Carmela, luyag nila maagom ang hustisya sa duha ka kabuhi nga nadula sa ila.
SA PIHAK NGA BAHIN… wala pa sa karun napahibalo ang apat ka tuig nga bata nga napatay ang iya iloy nga nurse kag ang manghod sini nga lalaki nga anum ka bulan nga ginabusong sang iloy.
Sa interview sang Bombo Radyo kay John Apostol, nakawitness sa natabo, may yara sang duty ang nurse nga si Maria Angela Buendia, 36-anyos, sa Valladolid kag kun kaisa gina-updan sang iya bana agud pasakyon ini.
Suno diri, naga-isahon lang si Buendia sang nagtabok ang ini kag nabunggoan sang Toyota Avanza Wagon nga ginamaneho ni Philip Jansen Cantiller, 30-anyos, residente sang Deca Homes Subdivision, Barangay Cabug, Bacolod City.
Suno diri, nagpreno pa ang salakyan apang ulihi na.
Bangod sa impact nagtabog sa pihak nga lane si Buendia nga nalapakan sang Toyota Vios nga ginamaneho ni Salvador Castro, 59-anyos, residente sang Barangay Crossing Pulupandan, Pulupandan.
Suno kay Apostol, nakita sini nga naggwa ang bata sa tiyan sang biktima kun sa diin ang lawas sang iloy kapin isa ka metro ang kalayu-on sa lapsag.
