Wala gid sang may nasalbar ang pamilya ni San Carlos City Mayor Renato Gustilo sa pagkasunog sang tatlo nila ka propedad kahapon.
Pahayag sini nga mismo ang iya asawa, bata kag yaya ang nakabati sang paglupok sang liquefied petroleum gas (LPG) nga ginapatihan rasun sang nagluntad nga sunog.
Suno diri, tatlo ang ila propidad nga nasunog nga ginalakipan sang isa ka building sa tupad sang Daisy ABC School, ang balay sang ila ginikanan nga amo ang ila gina-estaran kag ang ancestral hall sang iya lolo kag lola.
Paathag sang alkalde nga ang balay sang ila ginikanan ang nagaserbe na nga common nga balay nila nga mag-ulutod, apang bangod siya ang wala sang kaugalingon nga balay, gani siya ang nag-istar diri.
Pahayag ni Gustilo nga wala gid sang may nasalbar nga gamit ang iya asawa ilabi na nga madasig naglapta ang kalayo sa ila propedad nga human sa light materials.
Ginapakamaayo na lamang sini nga tanan nila nga salakyan ang gingamit gani wala sang may naulamid sa sunod.
Natabuan man nga wala sa Negros Occidental si Gustilo bangod ini ang naga-asikaso sang kontrata sa Manila sa pag-install sang starlink sa mga isolated barangays sang San Carlos City.
Sa karun, ang iya pamilya ang magapuyo na danay sa balay sang iya utod nga yara sa luwas sang pungsod.
Ginhambalan na lamang sini ang iya pamilya nga indi na lamang paminsaron ang mga nasunog, kag magbakal nalang sang panibag-o nga gamit.
