Wala na ginapalapitan sang iban nga tawo ang pamilya sang napatay nga apat ka tuig nga babayi bangud sang meningococcemia sa banwa sang EB Magalona sang Hunyo 12.
Suno sa amay sang bata nga si Crisanto Trasmonte sang Purok Sunrise, Brgy. Tanza, EB Magalona, nagsugod man lang ang pagbatyag sang iya bata sang naligo ini nga udtong-adlaw.
Dugang pa sini nga naghampang pa ang bata upod sa iban nga mga kabataan sang Hunyo 11 sang hapon.
Sang pagpuli sini, didto na kag nagreklamo ang bata nga masakit ang iya ulo kag nagapangluya ini.
Ginhilanat, nagpalanuka kag ginlupot pa ang 4-anyos.
Gilayon naman nila nga gindala ang bata sa Teresita Lopez Jalandoni Provincial Hospital sa ciudad sang Silay kag didto nila nahibaluan nga may yara ini sang meningococcemia.
Napatay ang bata sang tinalikdan nga Martes kag direkta na lang ini nga ginlubong.
Samtang ginpahayag sang amay nga wala naman dapat sang kabalak-an ang ila mga tupad-balay nga malatnan bangud nga nakainom na sila sang bulong.
