Wala na sang plano pa nga magpasaka sang kaso ang pamilya sang isa sa duha ka bangkay nga nasapwan sa tunga sang kampo sa Hacienda San Roque, Barangay Cubay sa ciudad sang La Carlota, Negros Occidental kahapon sang aga.
Ang duha ka mga bangkay ang ginkilala nga sanday Ernesto Jawud, alyas ‘Atong’, 32 anyos kag Glenn Arnaiz, alyas ‘Follow Up’, 29 yrs, old lunsay mga residente sang Barangay 6, Bacolod City.
Madumduman nga kahapon, nasapwan ang bangkay sang duha nga ginlubong sa sulod sang kampo.
Ang bangkay ni Jawud ang nakaputos sa trapal samtang ang bangkay naman ni Arnaiz ang may alambre sa tyan, nakahigot ang tiil kag naputos ang ulo sang duct tape.
Sa interview sang Bombo Radyo Bacolod kay Jean Fariolen, manghod ni Jawud, sang aga sang Mayo 3, naglakat ang iya magulang apang wala na ini nakapauli pa.
Suno diri, indi lamang siya ang wala nakapauli apang amo man si Arnaiz.
Pahayag ni Fariolen, wala na sila sang plano pa nga magpasaka sang kaso batok sa mga suspetsado kag indi na magpagamo pa.
Dugang pa sini, naimpluwensyahan lamang ang iya utod sang mga barkada sini.
Samtang, wala naman naghatag sang pahayag ang pamilya ni Arnaiz.
