Ginalantaw sang station commander sang Bacolod Police Station 1 nga mahimo nga mga estudyante man ang pila sa mga parokyano sang naaresto nga graduating criminology student sa drug buybust operation sa Buena Park Subdivision, Brgy. Estefania, Bacolod City sang Lunes sang gab-i.
Sa impormasyon sang Bombo News Team, ang subject person ang ginkilala nga si Aliasgar Hadji Mohammad, 23 anyos, residente sa lugar.
Sa interview sang Bombo Radyo Bacolod kay Police Major Eugene Tolentino, station commander sang Bacolod Police Station 1, natalana nga subong nga adlaw i-file ang kaso batok sa arestado nga paglapas sa RA 9165 ukon Comprehensive Dangerous Drugs Act of 2002.
Suno kay Tolentino, kapin isa ka tuig man ang ila ginpatigayon nga monitoring sa subject person nga estudyante.
Narecover diri ang duha ka knot tied transparent plastic bag, kag lima ka big heat-sealed transparent plastic sachet sang suspected shabu, kalakip na ang buybust item.
Ang suspected shabu ang ginabanta nagabug-at sang 75 grams nga may standard drug price nga P510,000.
Una na nga ginpahayag ni Tolentino nga suno sa ila asset, dalagko nga volume sang shabu ang ginadagdag kay Aliasgar, gani ginalantaw nila nga mahimo dako na ang nadispose sini antes napatigayon ang drug buybust operation.
Ginalantaw man sini nga kabahin na ini sang preparasyon sa Masskara Festival 2026.
Paathag ni Tolentino nga nagadamo ang transaksyon sang illegal nga druga sa ciudad sa kaangay nga selebrasyon, bangod diri ang nagaserbe nga sentro sang ginapadulungan sang mga tawo.
Gani ginpasanyog man sang kapulisan ang ila nga pagbantay, agud mapahagan-hagan ukon mapunggan ang pagsulod sang illegal nga droga subong nga masskara.
