Nagpanugyan ang pediatric hematologist practitioner sa syudad sang Bacolod sa mga ginikanan nga gilayon ipalantaw sa espesyalista kun may yara sang nakita nga mga sintomas sang cancer sa ila mga kabataan agud nga madapatan sang nagakaigo nga pagbulong.
Ginpahayag ni Dr. Carmelita Calahong sa Good Morning Philippines nga ang cancer sa mga kabataan ang wala nagadula bangud samtang nagadugay nagadamo nga nagadamo ang mga nagakatapikan sang nasambit nga balatian.
Suno kay Calahong ang early diagnosis ang may yara sang dako nga tsansa agud nga mag-ayo ang pasyente sa balatian.
Suno diri, importante ang kooperasyon sang mga ginikanan bangud ang mga ini ang una nga makakita nga may lain sa ila mga bata.
Suno sa doctor pila sa mga sintomas sang leukemia amo ang mga lagob kag wala nagauntat nga hilanat sang pasyente.
Ang cancer ang nagakatabo kun abnormal na ang dalagan sang dugo kag ang tissue sa lawas sang mga tawo.
Suno diri ang mga pasyente nga ginbulong sini ang nagdangat na sa 250 ka mga pasyente kag 55 percent diri ang nag-ayo na kag pila sa mga ini ang professionals na.
Gin-athag man sini nga kun may Leukemia ukon cancer sa dugo indi dapat madulaan sang paglaom bangud mahimo ini nga mabulong kag magaayo ang pasyente.
Ginpahayag man sini nga nagadamo ang kaso nga nagakadetect bangud nagataas ang awareness sang tawo.
Suno diri ang mga ginikanan indi dapat magkahadlok kun may nadiagnose nga may leukemia ang mga kabataan bangud mahimo ini nga mag-ayo kun ipabulong kag ang Ginoo na ang makahibalo kun mag-ayo ang pasyente sa pihak sang manubo nga tsansa kun ini ang naglala na antes natukiban.
Samtang ang mga cancer patients ang mahimo man nga makabaton sang COVID vaccine apang dapat may clearance nagikan sa ila mga doctor.
