Patay ang 40-anyos nga lalaki matapos ginbuno sang iya kainuman kahapon sang aga sang Domingo, Oktubre 5, 2025, sa Purok Riverside, Barangay Robles, La Castellana, Negros Occidental.
Ang biktima amo ang isa ka 40-anyos nga lalaki nga may live-in partner kag residente sang Hacienda Grande, Barangay Robles. Samtang ang suspek ginkilala sa alyas “Argile,” 40-anyos man kag may live-in partner, residente sang Bonifacio Extension sa pareho nga barangay.
Suno sa imbestigasyon sang La Castellana Municipal Police Station (MPS), natabo ang insidente pasado alas-5:00 sang aga samtang nagainom ang biktima kag ang suspek upod sa isa pa nila ka abyan sa guwa sang balay sang suspek. Ginpahayag sang inisyal nga imbestigasyon nga nagbaisay ang duha bangod sa indi pag-intindihanay kag epekto sang pagkahubog.
Natabo ang insidente, matapos na-trigger ang suspek sang gipanugyan sang biktima ang bata sang suspek, kabangdanan nga ginkuha sini ang isa ka gamay nga kutsilyo kag ginbuno ang biktima makapila ka beses sa nagkalain-lain nga parte sang lawas.
Ginlayon gindala ang biktima sa Rural Health Unit (RHU), apang ginpahayag nga dead on arrival (DOA) ini.
Ang bangkay sang biktima subong yara sa Marafion Funeral Homes para sa post-mortem examination.
Samtang nadakpan sa ginpatigayon nga pursuit operation ang suspek kag yara na subong sa kustodiya sang La Castellana MPS para sa nagakaigo nga disposisyon kag pagpasaka sang kaso.
Plano nga ipasaka ang kaso nga hoimicide batok sa suspek samtang ginahulat ang resulta sang eksaminasyon sang biktima.
Dugang pa sang kapulisan, wala sang narekord nga krimen ang biktima kag suspek antes ang insidente.
Padayon ang imbestigasyon sang kapulisan agud makuha ang dugang nga detalye kag ebidensya sa natabo nga krimen.
