Isa ka bangkay sang lalaki nga nasulod sa sako ang nasapwan sa higad sang dalan sa Barangay Cabatangan ciudad sang Talisay, kahapon, kapin ala- 1:00 sang hapon.
Ang bangkay ang nakasulod sa duha ka gintakop nga sako para matago ang bilog nga lawas sang biktima.
Sa interview sang Bombo Radyo kay Junior Villarin, nagabyahe ini sakay sa motorsiklo kaupod ang iya asawa kag paglabay sa area, ila napanimahoan ang maisog nga baho nagikan sa sako.
Sa pagtsekyar sini, iya ginhikap ang sako kag nabatyagan ang tiil sang tawo.
Gilayon naman ini nga nagtawag sa barangay nga nagkoordinar man sa kapulisan.
Sa karun, ginapatihan nga duha tubtob tatlo ka adlaw na nga napatay ang biktima nga ginhal-id sa kilid sang dalan.
Gilayon man nga nakilala ang patay nga lalaki.
Sa interview sang Bombo Radyo kay Police Major Wilfredo Benoman, Deputy Chief of Police sang Talisay City Police Station, alas- 5:00 sang hapon, kahapon, ginkumpirmar ni Joemar Espartero nga utod sini ang biktima nga amo si Jumon Espartero, 36 anyos, may live-in partner kag residente sang GK Hope Village sa nasambit nga barangay.
Suno diri positibo nga ginkilala ni Joemar ang iya nga utod santo sa panapton kag mga tattoo sini sa lawas.
Suno kay Benoman, humalin pa sang Mayo 12 nga wala nakapauli ang bitkima sa ila.
Samtang, suno naman kay Punong Barangay Jomar Baroquillo sang Barangay Cabatangan ciudad sang Talisay, wala sang record sa barangay ang biktima nga si Jumon Espartero magluwas na lamang nga masami sila nga mag-away sang iya asawa.
