Naka-heightened alert subong ang Philippine Coast Guard (PCG) sa bug-os nga Negros Island Region matapos makabaton sang intelligence report nga may mga miyembro sang New People’s Army (NPA) gikan sa Mindanao nga posible maggasulod sa Negros Oriental kag Negros Occidental.
Sa interview sang Bombo Radyo kay Lieutenant Junior Grade Richelito Arbis, Spokesperson sang Northern Negros Occidental, ginapa-alerto na ang mga dalagko nga pantalan sa Northern Negros agud mapabaskog ang seguridad kag pagmonitor sa nagasulod kag nagagwa nga mga sea vessels.
Suno kay Arbis, ginpadugangan na nila ang personnel nga magatsekyar sa mga pantalan kag ginpa-alerto man ang K9 units sa pagtutok sa mga gagmay nga bangka nga posible magamit sa pagsulod sang rebelde nga grupo.
Sa karun, pahayag sini nga base sa monitoring sang Coast Guard, wala pa sang may na-monitor nga may nakasulod nga rebelde sa rehiyon.
Mensahe sini sa publiko nga ireport gilayon sa pinakamalapit nga Coast Guard office ukon sa mga personnel sa ports kun may makita nga may presensya sang NPA.
