Dismayado ang Partido Demokratiko Pilipino (PDP) Deputy Secretary General for Visayas bangud kaangay nga ang ginalaot ukon gina-imbestigaran amo ang kaalyado lang sang Duterte.
Sa interview sa Bombo Radyo kay PDP Deputy Secretary general for Visayas Atty Jayvee Hinlo, ginpahayag ni Hinyo nga importante ang pagpasiguro nga may hustisya para sa tanan.
Suno diri, kun may sala man angot sa flood control project anomaly, bisan pa man kaalyado nila, dapat gid manabat.
Apang suno diri, dapat ginalaot man sang Ombudsman ang kaalyado ni Marcos nga nalakip sa ginapangalanan sang 18-marines nga mga pulitiko angot sa gina-alegar pag-deliver ang bilyones nga kwarta kay President Ferdinand Marcos Jr.
Naga-ugyon si Hinlo nga dapat matinlo ang linya sang mga pulitiko….Samtang nagapati si Partido Demokratiko Pilipino (PDP) Deputy Secretary General for Visayas Atty Jayvee Hinlo nga ma-acquit si Senator Robin Padilla kasunod sa ginpasaka sang Philippine National Police-Criminal Investigation and Detection Group (PNP-CIDG) nga Obstruction of Justice angot sa ginaalegar pagbulig kay Senator Ronald “Bato” Dela Rosa nga makapalagyo.
Sa interview sang Bombo Radyo kay Hinlo, ginpahayag sini nga wala sang may makapugong sa pulis nga mag-file sang kaso kun amo ang ila nga interpretasyon.
Bilang isa ka abogado, nagapati si Hinyo nga ma-acquit si Padilla bangud wala man ini sang ihibalo nga sa amo nga tion ginakabig nga “Fugitive” si dela Rosa kag wala man sang arrest warrant nga ginserbe.
Dugang pa, wala man sang nahatag nga kopya sang warrant sa Senate President kag kun maghatag gid man indi man sa gihapon ma-recognize bangud wala ini nag-agi sa interpol…Paathag sini nga madamo sang mahimo depensa nga makabulig kay Padilla nga ma-dismiss ang reklamo batok sa iya… Sa pihak nga bahin, ginlaragway sang Partido Demokratiko Pilipino (PDP) Deputy Secretary General for Visayas nga simbolo sang “disgust” ang pag-walk out sang pila ka mga Senate Minority Bloc members kasunod sa motion ni Senator Rodante Marcoleta nga tugutan ang isa ka senador nga makatambong sa session paagi sa video conference.
Sa interview sang Bombo Radyo kay PDP Deputy Secretary general for Visayas Atty Jayvee Hinlo, ginpahayag sini nga sa subong galalain ang minority bangud indi nila mabaton nga indi na sila ang nagadumala sa senado kag indi na masunod ang tanan nila nga gusto.
Ginbalikan sini ang nagligad nga liderato ni anay Senate President Vicente Sotto III kun sa diin suno sa iya, wala man sang mahimo ang grupo ni Senator Alan Peter Cayetano batok sa mga desisyon sang sila pa ang majority.
Suno pa sa iya, sang na-priso si former Senator Leila de Lima, may mga senador man nga nagahingyo nga tugutan siya nga makapartisipar sa Senate proceedings paagi sa video conferencing.
Pahayag sini nga nabag-ohan lang sila bangud indi na sila ang majority nga suno diri, sang una amo man ang nabatyagan sang iban ka mga senador kaangay sang grupo ni Cayetano.
Suno diri, ang realidad sa Senado amo ang “majority always wins”.
