Nagahandum pa kuntani nga mangin police ang 15 anyos nga dalagita nga nasapwan sang Miyerkules nga wala nasang kabuhi sa sulod sang kampo sa Hacienda San Roque, Brgy. Cubay, La Carlota City, Negros Occidental.
Sa exclusive interview sang Bombo Radyo Bacolod kay Janna Portoza, pakaisa ni Pearl Joy Galve, close gid sila ni Pearl kag sadto sang nag-upod sila nga nagtulog nagpromisa ang mga ini nga sila ang magakuha sang kurso nga criminology agud mangin police.
Suno kay Portoza, tanan sila nga magpakaisa ang naghandum nga mangin police agud nga makatibawas sila sa kapigaduhon.
Suno diri, nagtubo man ang ila nga handom nga mangin police bangud ang isa nila ka tiyo ang nagpolice kag sa karun nagatrabaho sa Bureau of Jail Management and Penology ukon BJMP.
Nagpromisa pa sila sa kada isa nga ang promisa nga ginbuy-an ang ila gid pagatumanon.
Sa karun, tuman ang kasubo ni Janna bangud wala na si Pearl kag indi na sini matuman ang ila nga handum nga mangin police.
