Ginakwestyon sang alkalde sa Bacolod City kun nagakaigo na ang penalidad nga gindagdag sang Bacolod City Water District (BACIWA) sa indi pagtuman sang Prime Water sa provision sang ila Joint Venture Agreement (JVA) sang 2022 nga maghatag sang 24 hours nga uninterrupted water supply sa mga Bacolodnon.
Suno kay Bacolod City Mayor Alfredo Benitez, may nadagdag na nga Notice of Violation ang BACIWA sang Enero subong nga tuig.
Sa paghinun-anon sini kay BACIWA General Manager Mona Dia Jardin, ang penalidad ang 6 porsyento sang performance fund, nga magadangat sa P2.4 million.
Apang ginakwestyon sa karun sang alkalde kun husto na ang P2.4 million sa masobra duha ka tuig nga pag-antos sang mga pumuluyo, partikular na sa mga lubog ukon wala sang nagakabatun nga tubig.
Sa karun, ginapaabot na lamang ni Benitez nga matapos na ang water security plan, kag dapat man nga maseguro nga ini ang masunod.
Aminado ang alkalde nga mahimo mag-ulan sa 2nd half sang subong nga tuig, apang dako ang posibilidad nga parehas man gihapon ang mangin sitwasyon sa masunod nga tuig.
