BACOLOD CITY – Plano sang bag-o gindesignar nga officer-in-charge sang Provincial Environment and Natural Resources Office (PENRO) nga ibalik ang Police Environment Desk Officer agud mas mabantayan ang kabukiran sang Negros Occidental.
Sa exclusive interview sang Bombo Radyo, ginpahayag ni PENRO Edgardo Rostata nga nakapatigayon na sila sang inisyal nga paghambalanay ni Negros Occidental Police Provincial Office (NOCPPO) Director Police Senior Supt. William Señoron tuhoy sa pagpalig-on sang law enforcement sa ibabaw sang kabukiran.
Ginpabutyag ni Rostata nga daku ang mabulig sang kapulisan pananglitan may yara sang paggamit sang puwersa ukon armas sang mga nagahimo sang ilegalidad sa bahin sang kabukiran nga indi na masulod sang mga forest rangers.
Ginpabutyag dugang ni Rostata nga sadtong Pebrero, antes pa man ini nagpungko nga OIC PENRO, may mga plano na ang talatapan agud mapahugot ang pagbantay sang kabukiran gikan sa ilegal nga pagpangutod sang kahoy.
