Ginahulat pa sang pinuno sang Bacolod City Legal Enforcement Team ang desisyon sang personnel sini nga gin-alegar nga ginpahog sang personnel sang Bureau of Jail Management and Penology (BJMP)-San Carlos City matapos nga naisulan sang salakyan sang BJMP personnel ang motorsiklo Bacolod City Lega Enforcement Team personnel sang Biyernes sa Libertad Public Market.
Ginkilala ang ginpahog nga City Lega Enforcement Team personnel nga si Roberto Jalandoni samtang ang personnel sang BJMP amo si Conrado Baliguas.
Sa interview sang Bombo Radyo Bacolod kay Rey Demisana, Bacolod City Lega Enforcement Team Leader, nakakitaay na si Jalandoni kag Baliguas sa opisina sang CLO apang wala pa ini sang update kun ano gid ang plano sang imbulbado nga personnel sang Bacolod City Lega Enforcement Team.
Ginbalikan man ni Demisana, ang natabo kun sa diin, sang Marso 1, gab-i, naisulan sang salakyan ni Baliguas ang motorsiklo ni Jalandoni kag nagluntad ang komosyon.
Dugang pa ni Demisana, may ginkuha nga bag si Baliguas sa iya salakyan kag ginpahog ang Enforcement Team kag ginhambalan nga pang ratraton ang mga ini.
Bangud sini nagpa-blotter sa Police Station 6 ang mga miyembro sang Enforcement Team nga ginupdan man ni Demisana.
Suno diri, malikawan man kuntani ang nasambit nga hitabo kun ang BJMP personnel nga nakapaidalom sa training kag mas may alam ang nag-intsindi.
Ginpahayag man sini, ginapang-akigan man sini ang mga Bacolod City Legal Enforcement Team personnel kag ginadisiplina kun may complaints, apang kun nakita sini nga ginadaog-daog kag ginapahog ang mga ini kag yara sa intsakto, tindugan kag pangapinan niya ini.
