BACOLOD CITY – Pagahandaan sang maayo sang Philippine team ang ikaduha nga hampang sa majors division sang Little League Softball World Series sa Portland, Oregon sa Estados Unidos.
Ini matapos nga napierde ang Negros Occidental Little League majors sa ila nga una nga hampang sa torneyo subong nga adlaw.
Alas 7:00 kaina sang aga, gin-atubang sang Negrense team ang South Beaverton Girls Little League nagikan sa Beaverton City, Oregon nga amo ang host team.
Nangin mainit ang hampang apang wala naka-iskor ang Philippine team samtang isa ka puntos naman ang host team sa second inning.
Ang team ang kabahin sang Pool B sang torneyo kaupod ang softball teams nagikan sa Indiana, USA; Puerto Rico; Texas, USA; kag ang team nagikan sa Oregon District 4.
Samtang, ala-1:00 bwas sa kaagahon, atubangon sang Negrense softball team nga may edad 11 tubtub 12 anyos ang Floyds Knobs Community Club Little League nagikan sa Floyds Knobs, Indiana nga tiglawas sang Central region.
