Ginpakigbahin sang chief finance officer sang Corazon Locsin Montelibano Memorial Regional Hospital (CLMMRH) nga nagdangat na sa masobra P255 million ang balayran sang Philippine Health Insurance Corporation (PHILHEALTH) sa ospital.
Suno kay Shareen Caelian, Chief Finance Officer sang Regional Hospital, nga ang balor ang para lang sa pag-asikaso sang mga COVID-19 patients kasubong man sa RT-PCR testing sa ulihi nga data sang ospital sang Mayo 21.
Sa kabug-usan nagdangat sa 595 ang mga kaso sang COVID-19 nga gincater sang Regional Hospital apang tatlo palang diri ang nabayaran sang Philhealth sa balor nga P810,305.
Sang ginpamangkot naman sang mga ini ang ahensya nahanungod sa balayran, gina-assess pa sang maayo basta isa ka COVID claims kasubong man ang mga requirements.
Pasalig naman sang Philhealth ginasunod sang mga ini ang turn around time nga nahisugtan.
Apang paathag naman ni Caelian nga 65 porsyento sang income sang Regional Hospital ang gikan sa Philhealth gani dako nga epekto sa ospital ang indi pagbayad sang ospital.
Nagresulta naman ini agud indi na makabakal sang kinahanglanon para sa mas ginpaayo nga serbisyo kag mga supplies kaangay sang bulong ang Corazon Locsin Montelibano Memorial Regional Hospital.
Bulan-bulan naman ang mga ini nga nagasulat, tawag kag nagapatigayon sang Dialgue sa PhilHealth.
Paathag naman ni Caelian nga wala sila nagapabaya sa pagkompleto sang mga requirements sang mga pasyentye agud nga wala na sang mairasun ang Philhealth balik sa ila.
Pasalig naman sini nga apisar sa sitwasyon, nagapabilin gihapon nga magabatun sang COVID Patient ang Regional Hospital bangod ila ini nga mandato.
