Humalin Marso 22, magapabilin pa tubtob bwas Abril 2 ang heightened alert status sang Philippine Coast Guard may kaangtanan sa Semana Santa.
Sa interview sang Bombo Radyo Bacolod kay Caost Guard Capt. Paterno Belarmino Jr, commander sa Coast Guard Station Northern Negros Occidental, sa “Oplan Byaheng Ayos Semana Santa 2024” sila ang nagdeploy sang 79 ka PCG personnel kasubong man 69 ka PCG auxillary member kag volunteers.
Yara sa 111 naman ang mga sea vessels nga na-inspect kag 203 ang motorbanca.
Nagdangat naman sa 52,666 ang outbound passenger nga narecord, samtang 51,346 naman ang inbound passenger.
Magluwas diri, alas-12:00 kaina sang kaagahon tubtob alas-6:00 kaina sang aga nakarecord sang dugang nga 2,762 outbound passengers kag 969 inbound passengers.
Suno kay Belarmino, may isa ka narecord nga drowning incident sa ciudad sang Cadiz.
Ini ang isa ka 28 anyos nga lalaki, nga ginapahayag nagpangisda, apang nasapwan na lamang sang iya mga kaupdanan nga naga-utaw utaw.
Suno diri, gintinguhaan pa nga marevive sang PCG Personnel ang biktima, apang ginbawian sang kabuhi.
Samtang may minor incident naman sa isa ka pasahero gikan sa Dumangas Port nga sakay sang Roll On Roll Off (RoRo) vessel ang naglingin ang ulo, nga gilayon man ginresonderan sang PCG personnel nga nakastation sa BREDCO Port, sa bulig sang Bureau of Fire Protection kag Sea marshall.
Wala naman sang may nastranded nga mga pasahero sang barko sa Semana Santa, kag may-ara lamang sang gamay nga congestion.
Pasalig ni Belarmino, nga sa kaangay nga mga okasyon 24/7 kag full force ang pagserbisyo sang Philippine Coast Guard.
Suno diri, magapadayun sila sa pagmonitor partikular na sa mga beach goers para sa summer season.
Ang PCG ang nagapatigayon man sang coastal inspection sa mga beach resorts, kasubong man ang inspection sa mga sea vessels nga nagabyahe paggwa kag sulod sa Negros Occidental.
Sa nangin paglibot sang bag-o nga PCG Commander, maayo man ang assessments sini sa mga ports kag magadugang na lamang ini sang pila ka mga implementasyon para sa improvement sang hanay.
