Nagapabilin nga mataas ang lebel sang gas emission sang Bulkan Kanlaon, santo sa monitoring sang Philippine Institute of Volcanology and Seismology (PHIVOLCS) as of June 1, 2024.
Sa interview sang Bombo Radyo kay Engr. Mari-Andylene Quintia, resident volcanologist sang PHIVOLCS-Negros Occidental, may lima ka volcanic earthquake nga narekord kahapon kun sa diin nagdangat sa 3,007 tons per day ang ginbuga nga sulfur dioxide (SO2) sang bulkan.
Samtang ang plume naman sini ang naglab-ot sa 150 metros.
Suno kay Quintia, indi kaangay sa normal nga 300 tons per day nga ginabuga sang bulkan nga sulfur dioxide, tuman ka taas ang ila nagakarecord sa karun, amo nga ginalantaw nga posible nga liwat nga mag-erupt ang bulkan.
Dugang pa sini, humalin pa lamang sang bulan sang Enero, nagpagwa na sila sang abiso bangod sa nagasaka nga lebel sang sulfur dioxide nga ila narekord.
Pahanumdom sini nga nagapabilin sa gihapon sa Alert Level 2 ang status sang bulkan kag wala sa gihapon ginapahanugutan ang pagsulod sa 4-kilometer radius Permanent Danger Zone (PDZ).
