BACOLOD CITY — Gin-engganyo ni Philippine Ambassador to Singapore Joseph Del Mar Yap ang duha ka Pinoy teams nga kaayuhon ang performance sa Asia Pacific Little League Softball Championship nga magasugod na Biyernes sang aga.
Kaina sang aga, nag-courtesy call sa ambassador ang teams sang Negros Occidental sa juniors kag majors division sang torneyo kaupod ang mga opisyal sang Department of Education.
Sa interview sang Bombo Radyo Bacolod, ginpahayag ni DepEd Region 6 Director Gemma Ledesma nga gin-engganyo sang ambassador ang pambato sang Pilipinas nga himuon ang tanan agud makuha ang kampeonato.
Nagpasalamat naman si Ledesma sa mga opisyal sang Negros Occidental, Bacolod City kag sa tanan nga mga nagasuporta sa softbelles agud mangin madinalag-on ang hampang sa Singapore.
Suportado man suno sa iya ni DepEd Secretary Leonor Briones ang duha ka teams.
Suno sa direktor, pangamuyo ang ila ginapangayo bangud tuman na kahanda ang mga players nga madala ang kampeonato sa ila nga pagpauli sa masunod nga semana.
Ang Asia Pacific Little League Softball Championship ang patigayunon halin Hunyo 29 tubtub Hulyo 1 sa United World College of South East Asia – Dover Campus sa Dover, Singapore.
