BACOLOD CITY – Wala napaslawan ang mga taga-Negros nga nagpulaw sa paghulat sa hampang sang Philippine team nga tiglawas sang Asia-Pacific region sa Senior League Softball World Series sa Estados Unidos.
Ini matapos ginlutos sang Negros Occidental Philippines Senior League ang Vidalia Girls Softball Senior League sa hampang nga nagsugod alas 12:30 kaina sang kaagahon.
Ginpakahuy-an sang Philippine team ang kasumpong nagikan sa Vidalia, Louisiana, USA nga tiglawas sang Southwest region sa score nga 6-1.
Ini na ang ikatatlo nga sunod-sunod nga kadalag-an sang Philippine team matapos ginlutos ang Latin American region kag East region kahapon sang aga.
Nahibaluan nga sa first game, wala naka-iskor ang ASOFEM Senior League gikan sa Maunabo, Puerto Rico nga tiglawas sang Latin American region sa hampang nga nagsugod alas 5:30 kahapon sang kaagahon.
Natapos ang match sa score nga 7-0 pabor sa Pilipinas.
Wala nagpapierde sa kakapoy ang Philippine team bisan sunod-sunod ang ila nga hampang bangud sa ikaduha nga game alas 8:00 kahapon sang aga, ginpakahuy-an sini ang District 18 Senior League nagikan sa Haverstraw, New York City nga tiglawas sang East region matapos nagdaog sa score nga 5-0.
Sa exclusive interview sang Bombo Radyo kay Kaith Ezra Jalandoni, pitcher sang softball team nga nakabase sa Negros Occidental, ginpahayag sini nga mapaanggid sa David-Goliath ang hampang bangud dalagkuan ang kontra apang wala sila nagpalingkang sa mga ini.
Sa baylo suno sa iya, nagpangibabaw ang teamwork kag pagsalig sa Diyos nga sila ang magadaog gani lubos ang ila pasalamat matapos nagmadinalag-on.
Si Jalandoni ang gindeklarar nga most valuable player sa Asia-Pacific Regional Softball Tournament sa Singapore sang nakaligad nga bulan.
Alas 3:00 buwas sa kaagahon, atubangon sang Negrense team ang host nga Delaware District 3 sa sa Bruce Layton Field sa Lower Sussex, Delaware.
