BACOLOD CITY – Liwat nakatilaw sang pagkapyerdi ang Negros Occidental softball team sa majors division sang nagapadayon nga Little League Softball World Series sa Portland, Oregon sa Estados Unidos.
Ala-1:00 kaina sang kaagahon (oras diri sa Pilipinas) nag-atubangay ang Negrense team, nga may edad 11 tubtob 12 anyos, kag Floyds Knobs Community Club Little League gikan sa Floyds Knobs, Indiana.
Halos katunga lamang ang score sang Negros Occidental Little League majors, nga nagatiglawas sang Asia Pacific Region, nga nakakuha lamang sang tatlo ka puntos samtang pito ka puntos naman ang nakuha sang Floyds Knobs, nga tiglawas sang Central Region.
Ini na ang ikaduha nga kapyerdihan sang Negrense softball team kun sa diin ang una na ini nga ginlutos sang South Beaverton Girls Little League nga gikan sa Beaverton City, Oregon kag amo ang host team.
Nahibaluan nga sadtong Lunes, natapos ang seniors division sang World Series kag silver medalist ang softball team gikan sa Negros Occidental kasunod sang pagkalutos sa host team nga Delaware District 3.
