BACOLOD CITY — Ginpasiguro ni Provincial Health Officer Dr. Ernell Tumimbang ang publiko nga may bastante nga suplay sang dugo sa Negros Occidental.
Sa interview sang Bombo Radyo, ginpahayag ni Tumimbang nga sa pihak sang maulanon nga panahon, indi tuman kadamo ang mga pasyente sang Dengue nga nagakuha sang dugo sa blood banks.
Ginpabutyag man sini nga napanubo na ang numero sang mga nagkalamatay bangud may dugo na nga sarang makuha sa mga blood banks sa probinsiya.
Subong man, sarang na mapatigayon ang elective surgeries ukon ang mga operasyon nga indi man emerhensiya, bangud may suplay na sang dugo.
Sa pihak sini, padayon nga ginapanawagan ni Dr. Tumimbang sa publiko nga padayon nga suportahan ang blood-letting activities bangud paagi sini, makatipon sang bastante nga suplay sang dugo nga magamit sa tion sang emerhensiya.
Ginpanginbulahan naman ni Governor Alfredo Marañon Jr. ang halos 400 ka mga awardees sa ginhiwat nga “4th Provincial Sandugo 2017-Pagkilala kag Pagpasalamat” kahapon.
Kadungan sini, nagpanawagan man ang gobernador sa mga nagbaton sang pagkilala kag pasidungog nga padayon nga suportahan ang blood-letting program sang probinsiya bangud para ini sa kaayuhan sang bug-os nga pumuluyong Negrosanon.
Suno kay Marañon, sa pagdonar sang dugo, may mabuligan nga iban kag makabulig man ini kun mismo ang nagdonar kag ang ila mga himata ang magkinahanglan sini.
Ginpabutyag sang amay sang probinsiya nga padayon pa nga ginapasanyog ang Negros First Blood Program.
Samtang, ginpanginbulahan man ni Gov. Marañon ang organizers sang “4th Provincial Sandugo 2017-Pagkilala kag Pagpasalamat” bangud sa kadamuon sang nagtambong nga nagakahulugan nga madamo naman ang nagadonar sang dugo sa karon.
