Indi luyag ang 27 anyos na nga taxi driver sa ciudad sang Bacolod nga magpabakuna batok sa COVID-19 bangod sa kahangawa nga mangin kaangay sa kaso sang Dengvaxia vaccine nga nagpukan sang madamo nga kabuhi.
Suno kay Benjamin Tendon, 54 anyos, indi ini luyag magpabakuna bangod wala pa maseguro ang bulong kag nahadlok man ini nga gulpyada nalang nga mapatay kaangay sang natabo sadto sa gintublukan sang Dengvaxia.
Indi man sini luyag nga magpabakuna ang mga himata sa kaangay nga kabangdanan apang suno pa diri wala naman sila sang mahemo kun igapilit ini sang gobyerno.
Nagapati man si Tendon nga para sa kaayuhan ang luyag sang gobyerno sa pagpatigayon sang pagbakuna apang nahangawa ini nga imbes nga mag-ayo makaangkon pagid sang masakit.
Pahayag pa sini nga kun magdangat na sa isa ka tuig kag wala sang mapatay bangod sa bakuna, makasalig na ini nga safe ang bakuna kag amo palang magapatublok.
Apang indi pa ini magrisgo bangod may posibilidad nga may magtuhaw pa nga negatibo nga epekto sa sulod sang anum ukon walo ka bulan.
