Ginbaha ang pil ka bahin sang probinsya sang Negros Occidental kasunod sa pagbubo sang madamol nga ulan tuga sang Shear Line.
Ginpaidalom sa Yellow Rainfall Warning ang ciudad sang Bacolod, Talisay, Silay, Cadiz, Escalante, Sagay, Victorias kag Bago City kag banwa sang Calatrava, EB Magalona, Manapla, kag Toboso.
Samtang naeksperyensyahan naman ang light to moderate rainfall sa ciudad sang Himamaylan, Kabankalan, La Carlota, Sipalay, kag San Carlos kag banwa sang Binalbagan, Isabela, La Castellana, Candoni, Cauayan, Hinigaran, Hinoba-an, Ilog, Murcia, Pontevedra, Pulupandan, San Enrique, Valladolid, Salvador Benedicto, kag Moises Padilla.
Sa ciudad sang Bacolod, pila ka area ang nag-eksperyensya sang pagbaha kaangay sang Purok Carvic, Barangay Mandalagan; Lacson Street; Barangay 10; Barangay 14; Pahanocoy; Sum-ag; Banago; Purok Isla, Barangay Villamonte; Purok Mars, Barangay Singcang Airport; Bangga Cory; Palanca St; kag iban pa.
Nagpatigayon sang clearing kag declogging operations ang CEO Rapid Drainage Response Teams sa paghawan sa mga drainage inlets agud madasig ang pag-ilig sang tubig.
May ginpatigayon nga pag-evacuate sa mga pumuluyo nga apektado sang baha.
Samtang, pila ka mga pumuluyo sa Barangay Paraiso, Sagay City ang nagsaka nalang sa babaw atop bangud naglapaw na sa tawo ang tubig baha pasado alas-11:00 kagab-i.
Nag-awas ang tubig sa Himoga-an Bridge nga nagakonekta sa Brgy. Bato kag Brgy. Baviera bangud sa padayon nga pag-ulan kag isa man nga rason ang high-tide.
Gilayon man nga nagpatigayon sang evacuation ang Sagay City.
Naeksperyensyahan man sang pila ka mga pumuluyo sa banwa sang Toboso kag Calatrava ang pagbaha.
