Gindayaw sang chief executive officer sang Metro Bacolod Chamber of Commerce and Industry si Bacolod City Mayor Alfredo ‘Albee’ Benitez bangud nga may yara ini sang plano kun paano sini solusyunan ang problema nga ginapangatubang sang ciudad.
Sa interview sang Bombo Radyo Bacolod kay Frank Carbon, nagadayaw ang sektor sang negosyo sa alkalde bangud may yara ini sang plano sa masunod nga tatlo katuig nga pagpungko sini agud nga magserbisyo sa mga pumuluyo.
Suno kay Carbon, ang alkalde ang may yara sang mga dalagko nga plano para sa ciudad sang Bacolod kag ang isa diri amo ang plastaron anay ang ciudad kun sa diin ang mga empleyado sa City Hall ang ginapareport na sang mas temprano kag wala na ginpabudlayan ang mga negosyante sa ciudad bangud nagbutang ini sang One Stop Shop para sa pagkuha sang business permits.
Maayo man suno sa chief executive officer sang Metro Bacolod Chamber of Commerce and Industry nga ginhimo na departamento ang magadeliher sang trapiko bangud mahimo nakita sang alkalde nga tuman kadako ang problema sa trapiko, gani may plantilla na para diri kag makahire na sang qualified.
Isa man sa ginlantaw sang alkalde ang mga merkado kun sa diin nahimuan naman sang plano kun paano ini kay-uhon.
Apang aminado man ini nga indi makaigo ang tatlo ka tuig agud nga makita nga may nagbag-o sa ciudad bangud ginalantaw nga anum ka tuig ang kinahanglanon agud makahimo sang pagbag-o.
