Ginakabig sang General Alliance of Workers Association (GAWA) nga kulang ang State of the Nation Address (SONA) ni Presidente Rodrigo Duterte bangud wala sini ma-address ang problema sa labor sector samtang nagapangatubang ang pungsod sang coronavirus pandemic.
Sa interview sang Bombo Radyo kay GAWA Secretary General Wennie Sancho, ginpahayag sini nga indi lang siya maghatag sang rating sa performance ni Duterte apang kun sa labor sector, wala gid sila mahatagan sang pagtamod.
Suno kay Sancho, 7.8 million ka mga Filipino ang nawad-an sang palangabuhian bangud sa COVID-19 pandemic apang wala gid ini matalakay sang presidente subong man ang recovery sang ekonomiya.
Suno sa iya, ang SONA ni Duterte ang may dala nga pamahog bangud sa sugod pa lang, iya na ginbanatan ang ABS-CBN kag si Senator Franklin Drilon.
Suno sa iya, ang SONA ang indi insakto nga lugar agud nga icritize ang iya political opponents kag gintawag ini ni Sancho nga “unethical”.
Suno sa iya, naghimo nanaman ang presidente sang promisa apang wala sini gindumdum ang nagliligad sini nga gintuad nga wala niya pa matuman. Samtang, pabor gid ang isa ka 81-anyos nga tigulang nga lalaki sa mga ginpahayag ni Presidente Rodrigo Duterte sa iya ika-lima nga state of the nation address (SONA).
Sa interview sang Bombo Radyo Bacolod kay tatay Eddie Hubiera, nagabulu-baligya sang dulce kag iban pa sa higad sang dalan kag residente sang Barangay Singcang Airport apang tumandok sang Poblacion, Bago City, ginpahayag sini nga kumporme siya sa tanan nga mga ginpahayag sang presidente bangud nagapati ini nga para sa ikaayo sang tanan ang mga plano ni Duterte.
Makita man sa gwa sang waiting shed nga ginahimo nga puluy-an ni tatay Eddie ang mga placard nga iya ginhimo nga nagapabutyag sang iya mga sintemyento kaangay na lamang sang Freedom of Expression, pagka-pabor sa Federalismo, pagkumporme sa Enhanced Community Quarantine kag iban pa.
Iya man ginsulat nga wala siya nadala sa Social Amelioration Program apisar nagapati siya nga kwalipikado gid siya kuntani sa amo nga ayuda.
Suno pa sa tigulang nga naka-intindi gid siya sa nagakatabo sa palibot kag sa sitwasyon sang pungsod bangud sa pagbasa-basa niya sang mga newspaper kag pagpamati sa radyo. Sa pihak nga bahin, indi makahatag sang rating si Abang Lingkod Party List Reprentative Stepehn Paduano sa performance ni Presidente Rodrigo Duterte matapos ini magpatigayon sang ikalima nga State of the Nation Address (SONA) sa Batasang Pambansa kahapon.
Sa interview sang Bombo Radyo kay Paduano, ginpahayag sini nga unfair kun magahatag ini sa rating sa performance ni Duterte bangud malapit anom ka bulan lang naimplementar ang mga ginpromisa sang Presidente sa iya ika-apat nga SONA bangud sa coronavirus disease 2019.
Suno sa iya, ang SONA ni Duterte kahapon ang pinasahi kaangay sang nagliligad nga mga tuig nga wala pa sang pandemic.
Wala man ginlauman sang representative nga pagdiskusyunan ang nahanungod sa illegal ng druga.
Nagakomporme man ini sa desisyon sang presidente nga pagpauntat anay sang face to face learning tubtob may yara na sang bakuna.
Ginpahayag man ni Paduano nga dako nga bagay ang ginhambal ni Duterte nahanungod sa development sang Boracay kag dapat suportahan gid ini.
Manami man suno sa iya ang mga plano sang gobyerno sa pagsuporta sa sektor sang agrikultura kaangay sang Plant Plant Plant Agricultural Package apang ang mabudlay diri, suno sa representati, ang implementasyon sang programa.
