Luyag nga maathagan sang 33 ka drivers sa idalom sang MBMJ & UY Cooperative kun sa diin na nagkadto ang para sa ila nga fuel subsidy.
Nagdangop si Andy Englis, residente sang Brgy Bata kag isa sa mga driver sang modernized jeepney sa Ipa-Bombo Ta segment bangod suno diri, wala pa nila gihapon nabatun ang P5,000 nga fuel subsidy gikan sa Department of Social Welfare and Development, kag P1,500 gikan sa Land Transportation Franchising and Regulatory Board.
Pahayag ni Englis nga tatlo ang tag-iya sang kooperatiba nga ginalakipan sang MB, MJ, kag UY, kun sa diin ang mga drivers sa idalom sang MB kag MJ ang nakabatun na sang fuel subsidy.
Suno diri, may 33 ka units sa idalom sang UY nga ginalakipan sang 23 nga nagbyahe sa Bata-Libertad nga routa kag 10 sa Alijis-Central Market.
Pahayag sang tag-iya sang UY nga si Mary Jane Uy sa ila nga ginbalik sini ang tseke agud pa-islan kuntani bangod ang signatory ang nakapangalan sa Presidente nga tag-iya sang MB.
Suno kay Englis, ang tag-iya sang UY kag sang MB ang may-ara sang conflict, gani indi magpapirma ang ila employer agud makuha ang tseke.
Nakig-angot man sila sa Public Employment Service Office – Bacolod, apang sabat lamang sang mga ini nga LTFRB Region 6 ang nagaproseso sang verification.
Pahayag ni Englis nga luyag lamang nila nga mabal-an kun diin na nagkadto ang pondo, bangod sa pagfollow-up nila sa tag-iya sang UY, ginasabat lamang sila nga “indi na mag-asa.”
