BACOLOD CITY – Nagpasalamat ang pila ka mga Overseas Filipino Workers sa Hong Kong nga wala sang nadisgrasya ukon nangin biktima sang bagyo Hato nga naglaslas kahapon.
Sa report ni Bombo international correspondent Merly Bunda, malipayon ang mga Pinoy ilabi na ang mga taga-Iloilo kag Bacolod nga hilway ang mga ini bisan ginpaidalom sa signal number 10 ang rehiyon ukon signal number 5 kun diri sa Pilipinas.
Gindula sini ang kahangawa sang mga pamilya sang mga OFWs kag ginpahayag nga wala sang pilason ukon napatay, bisan amo ini ang pinakamabaskog nga bagyo nga naglabay sa Hong Kong sa sulod sang nakaligad nga lima ka tuig.
Apang aminado si Bunda nga may pila ka mga Pinoy nga nakabatyag sang kahadlok ilabi na ang mga naga-istar ukon nagatrabaho sa matag-as nga building.
Sa karun suno sa Bombo correspondent, nagapadayon ang clearing operations sang gobyerno sang Hong Kong kag may pila pa ka mga lugar nga indi masudlan sang double-decker bus bangud sa mga puno sang kahoy.
Kaina, nagsilak na ang adlaw sa rehiyon apang may panalagsahon pa nga pagluntad sang magal-umon nga kahawaan.
