Ginakabig sang transport group nga Bacolod Alliance of Commuters, Operators and Drivers (BACOD-Manibela) nga “bias” ang pagpatuman ni President Ferdinand Marcos Jr. sang buhin nga P10 kada litro sa presyo sang krudo para sa mga public utility vehicle (PUV), nga may maximum nga 150 liters kada semana sa sulod sang tatlo ka bulan.
Sa interview sang Bombo Radyo kay BACOD- Manibela President Rudy Catedral, mabudlay kag sikwawi para sa ila ang guidelines sang programa bangud suno diri, ang limit nga 150 liters kada semana ang indi nila malab-ot.
Bangud suno diri, sang una nga P52 pa ang presyo sang krudo nagatuhong sila sang 15-18 ka litro sa sulod sang isa ka adlaw.
Sa subong nga tuman na ka mahal ang krudo, pahayag ni Catedral nga ang diskarte sang ila mga drivers amo ang minimun nga anum katiyog sa isa ka adlaw kag naga-consume nalang sang 10 ka litro.
Bangud sini, paathag ni Catedrlal nga indi sila gihapon kwalipakado sa programa nga ginapatuman sang President.
Suno kay Catedral, dapat kuntani automatic na nga mahatagan sang discount ang tanan nga PUV kag indi na pabudlayan pa.
Dugang pa, may mga transport groups nga dako ang konsumo sang krudo apang wala sang ginabaton nga ayuda, samtang ang iban nga sektor kaangay sang tricycle ang mas gamay lang ang ginakunsomo nga gasolina kada adlaw ang nauna pa mahatagan sang ayuda.
Pahayag sini, ginalauman sang BACOD-Manibela nga hatagan sang dugang nga konsiderasyon ang ila grupo. Samtang
Indi kumpurmi ang transport group nga Sentrong Samahan ng mga Tsuper at Operators Negros sa pagpatuman sang P10 discount sa maximum nga 150 liters sang mga public utility vehicle (PUV) drivers.
Sa interview sang Bombo Radyo Bacolod kay SSTONE Secretary General Junjun Asis, aminado ini nga makabulig man sa mga driver ang P10 nga discount sa kada litro sang matughong, apang gamay lamang ang kapin P1,500 nga masave sa tuman ka mahal nga presyo sang Diesel, kun sa diin may-ara na sang balor P155 kada litro.
Suno diri, tuman ka bug-at para sa mga drivers ang masobra isa ka gatos nga presyo sang kada litro sang gatong.
Kwestyon man sini kun paano mamonitor sang gobyerno kun nagdangat na sa 150 liters ang natughong sang salakyan bangod lainlain man nga gasolinahan ang ila ginatughungan.
Panugyan ni Asis nga mas dako dako kuntani nga bulig kun ginsuspender ang fuel excise tax kag 12 percent value added tax sa produktong petrolyo.
