Ginpahayag sang secretary general sang United Negros Drivers and Operators Center (Undoc) nga ang rason nga sila ang nagsulod sa pagpaconsolidate sang ila units ang bangod nga sila ang nakaintindi nga naghatag ang gobyerno sang 27 ka bulan para sa traditional jeepneys nga makabyahe pa basta makabig nga road worthy ang ila nga unit.
Sa interview sang Bombo Radyo Bacolod kay Diego Malacad, ginhatagan sang oras ang pagtuon sang posible nga mangin layi nga modernization program amo nga naghatag ang gobyerno sang pahanugot nga makabyahe pa ang traditional jeepneys sa sulod sang duha ka tuig kag tatlo ka bulan matapos nga sila ang makapaconsolidate.
Suno diri, nagdesisyon ini nga magpaconsolidate bangod nga nakita sini nga may yara sang kadalag-an para sa ila nga nagabyahe sa dalanon.
Samtang, nagpanawagan naman ini sa iban nga transport group nga nagapamatok nga tun-an ang layi kag maghatag sang respesto sa iban ilabi na sa mga line agencies.
Pahayag ni Malacad, nag-umpisa ang rally sang Abril 30, 2024 kag ini naglawig sang pila ka adlaw apang sa karun dapat nga lantawon kun ano ang makuha nga kamaayuhan sa pagpatigayon sang rally kag kun bala matapos ang tanan nga pagpamatok, ano ang mangin alternatibo para sa mga traditional jeepney drivers kag operators.
Samtang nagaplano ang Bacolod Alliance For Commuters Operators and Drivers Inc. kaupod ang Pagkakaisa ng mga Samahan ng Tsuper at Opereytor Nationwide (PISTON) kag MANIBELA sang isa ka major nga rally protesta sa bilog nga Pilipinas antes ang Mayo 15.
Sa interview sang Bombo Radyo Bacolod kay Rudy Catedral, presidente sang BACOD, kun wala sang may maggwa nga memorandum circular antes ang Mayo 15 sang extension sa ila nga prangkisa ukon Provisional Authority, may yara sila sang ginaplano nga patigayunon nga dako nga protesta nationwide.
Suno diri, wala naman sang may matabo nga dakpanay basta updated ang Official Receipt (OR) ukon Certificate of Registration (CR) sang mga nagabyahe.
Samtang, pahayag sini nga normal lamang nga maghatag ang ciudad sang Bacolod sang QR code para makilala ang mga consolidated jeepneys apang indi ini big deal para sa ila sa BACOD bangod nga sila nagapanindugan nga indi sila magpaconsolidate kag indi nila luyag nga madulaan sang palangabuhian.
Sila ang nagaduso nga magparehabilitate sang ila units apang indi sila magpaconsolidate bangod nga palpak ang mga kooperatiba sa ciudad sang Bacolod kag probinsya sang Negros Occidental nga nag-engage sa modernization program.
