BACOLOD CITY – Padayon ang pag-abanse sang Negrense softball team nga tiglawas sang Asia-Pacific region sa ila mga kontra sa Senior League Softball World Series sa Estados Unidos.
Alas 3:00 kaina sang kaagahon, nagsabak sa ikaapat nga hampang ang Negros Occidental Philippines Senior League sa Pool A sang World Series sa diin ila nga nakasumpong ang host team nga Delaware District 3.
Natapos ang hampang antes ang alas 5:00 sang kaagahon sa diin ginlutos sang pangayaw nga team ang tumandok sa score nga 1-0.
Ini na ang ikaaapat nga sunod-sunod nga kadalag-an sang Philippine team sa World Series.
Kahapon sang kaagahon, ginlutos sang Negrense team ang Vidalia Girls Softball Senior League nagikan sa Vidalia, Louisiana, USA nga tiglawas sang Southwest region sa score nga 6-1, alas 12:30 sang kaagahon.
Sang Miyerkules sang aga, ila man nga ginpierde ang ASOFEM Senior League gikan sa Maunabo, Puerto Rico nga tiglawas sang Latin American region kag District 18 Senior League nagikan sa Haverstraw, New York City nga tiglawas sang East region.
Bangud sang ila kadalag-an, ginahandaan na sang taga-Negros ang pag-atubang sa iban nga mga teams sa Pool B sa diin yara ang mga players nagikan sa British Columbia, Indiana USA, Netherlands, Virginia USA kag Montana USA.
Ang hampang sang softball team nga nakabase sa Negros Occidental ang ginapatigayon sa Bruce Layton Field sa Lower Sussex, Delaware.
