Ginpirmahan na sang Pilipinas kag United Arab Emirates (UAE) ang Comprehensive Economic Partnership Agreement (CEPA) kadungan sang pagbisita ni President Ferdinand “Bongbong” Marcos Jr. sa Abu Dhabi.
Ang pagpirma sang nasambit nga kasugtanan ang ginpangunahan ni Marcos kaupod si UAE President Sheikh Mohamed bin Zayed Al Nahyan sa Abu Dhabi Sustainability Week 2026 nga ginhiwat sa Abu Dhabi National Exhibition Center.
Ang CEPA ang labing una nga free trade agreement sang Pilipinas sa isa ka pungsod sa Middle East.
Target sini nga pabaskugon ang pagbayluhanay sang mga produkto sang duha ka mga pungsod kag magahatag sang mas dako nga oportunidad para sa mga Filipino.
Sa idalom sang kasugtanan, maganubo ang buwis sang pila ka mga produkto kag mas mapalapad ang balaklan sang Pinoy products.
Sakop sang CEPA ang mga importante nga sektor lakip na ang digital trade, micro-business, service, kag sustainable development.
Samtang, ginbisitahan man ni President Ferdinand R. Marcos Jr. ang mga Filipino sa isa ka community gathering sa Abu Dhabi sa tion sang Working Visit sa United Arab Emirates (UAE) sang Enero 13, 2026.
Suno kay His Excellency Alfonso Ferdinand Ver, Philippine Ambassador to the UAE, may yara sang 1 million ka mga Filipinos ang nagapuyo kag nagatrabaho sa nasambit nga pungsod.
Sila ang ikaapat nga pinakadako nga komunidad sa UAE.
Ang mga Overseas Filipino workers (OFWs) sa UAE ang ginlakipan sang skilled workers, professionals, service workers, entrepreneurs, kag creatives.
Kaupod sang presidente nga nagpadulong sa UAE amo sanday First Lady Louise Araneta-Marcos, pila ka mga Cabinet Secretaries, kag Philippine Embassy officials kag personnel.
Samtang kadungan sang pagbisita ni President Ferdinand “Bongbong” Marcos Jr ginpresentar sini sa mga OFWs sa UAE ang E-GOV app nga ginhimo sang Department of Information and Communications Technology (DICT).
Suno kay Marcos ang nasambit nga applications ang mahimo nga ma-download sa smartphones agud nga mas mahapos na ang pag-acccess sang kinahanglanon nga serbisyo sang gobyerno.
Bangud sa nasambit nga application ang mga Filipino ang indi na kinahanglan magpila sa mga opisina sang government agencies sa pagproseso.
