Gintawag nga ROC ang Stratolaunch Model 351, isa ka dako nga eroplano nga ginhingadlan sa isa ka mythological nga higante nga pispis.
Ang eroplano ginapatihan nga sarang makakarga sang mga elepante.
Una na ini nga gingamit para magdala sang mga rockets agud ipalupad sa kahawaan.
Ginbag-o nila ang plano matapos magtaliwan ang isa sa co-founder sang pag-ubra sang eroplano nga si Paul Allen.
Sa baylo nga maglunsar sang mga rockets sa outerspace, ang eroplano sa karon amo ang ginagamit para sa paglunsar kag pagtesting sang mga hypersonic aircraft kag missile.
Kun lantawon, ang eroplano ang daw ginhugpong nga duha ka jet plane.
Ang tagsa ka kilid sang eroplano malaba gid kag suportado sang madamo nga royda sa iya nga paghugpa.
Sa kabug-usan, may-ara ini sang 28 ka royda.
Tuman ka lapad ang pakpak sang eroplano nga nagadangat sa masobra isa ka football field, gani gintawag ini nga widest airplane sa bug-os nga kalibutan.
Ang Stratolaunch ROC nagakinahanglan sang 12,000 ft nga kalayuon agud makalupad, kag ini sarang makadala sang 250 tons nga kabug-aton, mas mabug-at sang 10 percent sangsa iya kaugalingon nga bug-at.
Ginlunsar ang Stratolaunch ROC sang 2011 bilang prototype kag naglupad ini sa una nga tion sang 2019 kag nakahimo na sang 24 ka paglupad tubtob sa karon.
