Ginpamatud-an ni Olympic gold medalist Hidilyn Diaz nga indi mapunggan sa pagtipon sang medalya sa patag sang weightlifting.
Subong nga hapon, nagpangibabaw ang una nga Olympic gold medalist sang Pilipinas kag nakakuha sang gold medal sa women’s weightlifting 55 kilogram event sa 31st Southeast Asian Games sa Hanoi, Vietnam.
Nahakwat ni Diaz ang kabug-usan nga 206 kilograms matapos nga makahakwat sang 92 kilograms sa snatch kag 114 kilograms sa clean and jerk.
Nag-attempt kuntani si Diaz nga maka-set sang bag-o nga SEA Games record nga 121 kilograms sa clean and jek apang ini ang napaslawan.
Gin-break sini ang una nga SEA Games record nga iya ginauyatan sa snatch nga 91 kilograms apang ini ang nabreak man sang isa ka weightlifter.
Si Diaz ang nagcompete batok sa lima ka lifters lakip na si Sanikun Tanasan sang Thailand nga gold medalist man sa 2016 Rio Olympics.
Ini na ang ikaduha nga gold medal ni Hidilyn sa biennial meet matapos makakuha sang bulawan nga medalya sa 2019 edition sang SEA Games nga ginpatigayon sa Pilipinas.
