Dismayado ang chief executive officer sang Metro Bacolod Chamber of Commerce and Industry (MBCCI) sa pagpaiway ni Presidente Rodrigo Duterte sa nauna na nga desisyon sang Inter-Agency Tsk Force nga pahanugutan ang mga minors nga naga-edad 10 tubtob 14 anyos nga makagwa sa panimalay sa mga lugar nga yara sa idalum sang modified general community quarantine (MGCQ).
Nahibaluan nga ang pagpaiway ang bangud sa UK Variant sang COVID-19 nga natukiban sa pila ka mga pasyente sa pungsod.
Sa karun, 15 tubtob 65 anyos palang ang ginapahanugutan nga makagwa sa- panimalay bangud sa pandemic.
Sa interview sang Bombo Radyo Bacolod kay Frank Carbon, chief executive officer sang MBCCI, ginpahayag sini nga dismayado gid sila bangud nga dako naman ang madula nga age bracket nga kuntani makadugang-dugang sa ila nga benta.
Suno kay Carbon, 50 porsyento sang economic activities ang nagahalin gid sa family affairs nga ginalakipan sang mga kabataan.Nagapasalamat na kuntani ang business sector sa una nga nangin pahayag sang Malacañang nga sugod Pebrero 1 pwede na makagwa ang mga kabataan nga naga-edad 10 pasaka bangud makabulig ini sa economic recovery.
Sa karon nagadihon na sila sang position paper agud ipadala kay Mayor Evelio “Bing” Leonardia para maghingyo nga madugangan ang business hours sa ciudad.
Natalana man sila nga magsapol subong nga adlaw upod ang National Economic and Development Authority (NEDA) Region 6 agud nga lantawon ang plano para sa economic recovery subong nga tuig kag sa masunod pa
