Ginakalipay sang mga opisyales sa ciudad sang Bacolod ang plano nga pagtukod sang pinakadako nga school campus sang Philippine Science High School sa Brgy Granada, Bacolod City.
Sa interview sang Bombo Radyo Bacolod kay Bacolod City Secretary to the Mayor Atty Marty Go, ini ang mangin ika-17 nga school campus sang PISAY, kag amo man ang pinakadako.
Pahayag sini nga mapalaron ang ciudad nga diri napili nga tukuron ang prestihiyoso nga eskwelahan nga ginapadalagan sa idalom sang Department of Science and Technology (DOST).
Gin-offer naman sang ciudad ang bahin sang 74 hectares nga duta nga ginbakal sang ciudad sa Brgy Granada.
Suno kay Go, nagapangita ang PISAY Board of Trustees sang dako nga ciudad nga makitaan sang maayo nga progreso sa ekonomiya apang indi pa overpopulated indi kaangay sa Cebu.
Dugang pa nga nagapangita ang PISAY sang siyam tubtob napulo ka ektarya nga duta agud may ligwa pa para sa expansion.
Kahapon nagmeeting na ang PISAY Board of Trustees kay Bacolod City Mayor Greg Gasataya dala ang board resolution nga naga-aprubar sang Bacolod City nga tukuran sang ila school campus.
Pahayag ni Go nga dako nga oportunidad sa mga Bacolodnon kag Negrense kun sila ang makapasar sa hugot nga requirements sang eskwelahan.
Ini bangod ang tanan nga estudyante ang makabig scholar sang DOST, libre ang tuition fees, libre ang textbooks, kag may-ara pa sang allowances.
Apang ang pag-eskwela diri ang may ara man nga ginapangita nga standard nga dapat ma-meet sang mga estudyante.
Target sang PISAY nga masuguran ang ila operasyon sa school year 2027-2028 paagi sa pag-enroll sang 120 ka Grade 7 students.
Ang Bacolod City Government ang wala naman sang gastuson sa nasambit nga proyekto.
