Ginpunggan pa si Police Master Sergeant Romulo Galvez sang iya lima ka tuig nga bata nga babayi nga indi na magbalik sa trabaho sang Abril 9 sang gab-i antes natabo ang drug buy bust operation sa Barangay Singcang Airport, Bacolod City kun sa diin natirohan ang biktima sang subject person nga si Ronelo Panoncillo nga nagresulta sa iya kamatayon.
Sa interview sang Bombo Radyo sa iloy nga si Verginia Galvez, kapin alas- 8:00 sang gab-i sang Abril 9, nagpauli ang iya bata apang pila lamang ka minutos ang naglabay sang gintawagan ini agud magreport balik sa trabaho.
Nakita sini nga kaangay maluya ang iya bata kag ginhambalan pa niya si Romulo nga manyapon anay antes maglakat apang nagpamalibad ini kag naghambal nga mabalik lang siya gilayon pauli kag magkaon.
Samtang, ginhambalan man sini ang iya bata nga mabalik siya sa trabaho kag ginhambalan siya sang bata nga indi na.
Makalipas ang pila ka oras, may patrol nga nagpadulong sa ila balay kag ginpahibalo sila nga natirohan si Romulo kag gindala na sa ospital.
Nag-upod ang asawa sang biktima sa patrol samtang nag-rosaryo naman si Verginia.
Apang wala pa natapos ang iya pagpangamuyo sang nabatian sini nga naghibi ang iya bana kag ang isa niya ka apo kag amo na lang sang ginhambalan siya nga napatay na si Romulo.
Pahayag sini, nabatian niya pa paagi sa tawag sa cellphone ang singgitan sang iya bata nga nagapangita sa iya.
Tuman ang hilibion sini bangod maboot kag mabinalak-on nga tawo ang iya agot nga bata.
Samtang, nagbisita si Police Regional Office -Negros Island Region Director Police Col Arnold Thomas Ibay sa pamilya ni Galvez agud hatagan sang Medalya ng Kadakilaan si Galvez sa sakripisyo kag serbisyo sini sa trabaho bilang miyembro sang Station Drug Enforcement Team (SDET).
Natalana nga ilubong si Galvez sa Forest Lake apang igakumpirmar pa kun sa Abril 26 patigayonon ang paglubong.
