Pagasuspendihon sang Philippine National Police (PNP) ang permit to carry firearms outside residence (PTCFOR) kadungan sang 15th Bacolaodiat Festival, ang pagselebrar sang Bacolod sa Chinese New Year.
Ang approval sang gun ban ang ginpahibalo ni Brig. Gen. Rene Pamuspusan, director sang Police Regional Office 6 kay Col. Henry Biñas, director sang Bacolod City Police Office (BCPO) paagi sa isa ka memorandum nga napetsahan January 22, 2020.
Ang kopya sini ang ginrelease sang BCPO Police Community Relations Branch sang Huwebes.
Suno kay Pamuspusan, parte ini sang security operations agud masiguro nga ang festival ang mangin hilway sa mga firearms-related incidents kag masiguro ang kaluwasan sang mga pumuluyo kag mga local kag foreign tourists.
Ang request ni Pamuspusan nga isuspende ang PTCFOR sa Bacolaodiat Festival 2020 ang gin-approve ni PNP Chief General Archie Gamboa sang January 15.
Suno sa memorandum, ang suspension sang mga permits nga magdala sang firearms ang magasugod alas-12:00 sang kaagahon sa Enero 31 kag magatapos alas-12:00 sang kaagahon sa Pebrero 3.
Suno kay Lt. Col. Lester Leada, chief sang BCPO Operations Branch, ginpreparahan nila sang maayo ang seguridad sang three-day festivities.
Gindugang man sini nga masobra 800 ka mga police personnel ang igadeploy sa duha ka festival sites – ang Lacson Tourism Strip kag ang Bacolod City Government Center.
