BACOLOD CITY – Gilayon nga ginpasaka sa full alert status ang alerto sang mga pulis sa isla sang Negros kasunod sang kalakasan sang Maute terror group sa Marawi City.
Kanina sang aga, nagsapol ang Police Regional Office 18 kag iban pa nga ahensya sang gobyerno bangud indi malayo nga makalab-ot sa Negros Island Region ang mga terorista nagikan sa Marawi kag iban pa nga bahin sang Mindanao pinaagi sa paglabay sa southern Negros Occidental ukon sa Negros Oriental.
Sa interview sang Bombo Radyo kay PRO 18 Director Police Chief Supt. Edmund Gonzales, paga-doblehon sa karun ang inspeksyon sa tanan nga mga Ro-Ro vessels kag bangka sa Hinobaan kag Sipalay City kag sa iban pa nga parte sang Oriental Negros sa bulig sang Philippine Coast Guard kag Philippine Navy.
Paathag ni Gonzales, makaya sang pumpboat sang mga bandido ang distansya sang Negros Island gikan sa Marawi ukon bisan maglabay pa ang mga ini sa Zamboanga.
Bangud sini, nagpanawagan si Gonzales sa mga residente kag sa mga pulis nga mangin vigilante sa ila nga area of responsibility.
Ginhingyo man sang regional director ang kooperasyon sang mga punong barangay sa mga coastal areas kun sa diin sarang nga makadungka ang mga terorista.
