Nagpanindugan ang Philippine National Police (PNP) nga wala sang pagpamahog sa kabuhi ni Kingdom of Jesus Christ founder kag leader Apollo Quiboloy, indi kaangay sa ginahambal sang kampo sini.
Suno sa abogado sang KOJC sang Biyernes, may yara sang pagpamahog sa kabuhi sang pastor rason kun ngaa wala ini nagasungka sa mga otoridad.
Suno kay Atty. Israelito Torreon, may yara sang extraordinary rendition nga pagadal-on ini sa Estados Unidos apisar nga wala pa napamatud-an ang iya pagka-inosente diri sa pungsod rason kun ngaa nagrequest si Quiboloy nga magpirma lamang kuntani sang written declaration si President Ferdinand Marcos Jr. nga indi siya pagdal-on sa Amerika.
Apang suno kay PNP PIO Acting Chief at Spokesperson Col. Jean Fajardo, si PNP Chief Gen. Rommel Francisco Marbil na mismo ang nanigurado sang kaluwasan ni Quiboloy kag iban pa nga mga akusado kun sila ang magasungka.
Suno kay Fajardo, assurance sang PNP nga sila ang preparado nga maghatag sang seguridad kay Quiboloy kag kun anuman ang ginahimo sang PNP sa KOJC compound sa Davao City ang nasanto sa layi.
